Botninn datt úr rekstri flugfélaga þegar Covid-faraldurinn hófst í ársbyrjun 2019. Ráðamenn víða um heim gripu þá til þess að styðja sérstaklega við flugrekstur í sínum löndum, bæði með lánveitingum og eins kaupum á hlutabréfum. Hið þýska Lufthansa fékk þannig stuðning og kærðu stjórnendur Ryanair, stærsta lágfargjaldaflugfélags Evrópu, þá ráðstöfun.
Í dag kom svo loks dómur undirréttar Evrópudómstólsins í málinu og samkvæmt honum var þessi opinberi stuðningur ekki lögmætur. Skiptir þá einu að framkvæmdastjórn Evrópusambandsins hafði áður gefið grænt ljós fyrir stuðningi við flugfélög í ljósi þeirrar fordómalausu stöðu sem þau voru í.
Stuttu eftir að dómurinn í máli Lufthansa féll í morgun þá kom niðurstaða í sambærilegu máli sem beindist að opinberum stuðningi við SAS, stærsta flugfélaga Norðurlanda. Ríkisstuðningurinn sem það félag fékk var sömuleiðis dæmdur ólögmætur.
Hverjar afleiðingarnar verða fyrir SAS og Lufthansa liggur ekki fyrir á þessari stundu en hið síðarnefnda hefur greitt tilbaka það fé sem félagið fékk á sínum tíma. Þýska ríkið hefur einnig selt hlut sinn í flugfélaginu með töluverðum ágóða.
Staða SAS er flóknari því það félag hefur undanfarna 10 mánuði notið gjaldþrotaverndar fyrir bandarískum dómstólum og hefur nýtt þann tíma til að semja við kröfuhafa. Þar á meðal danska, sænska og norska ríkið sem hafa fallist á að breyta kröfum í hlutafé.
Forsvarsfólk SAS hefur ekki gefið út nein viðbrögð um áhrif dómsins á þau áform.