Þó afkoma Play hafi ekki verið í takt við það sem lagt var upp með þá hafa áætlanir félagsins um stækkun flugflotans ekki breyst. Fyrsta sumarið var félagið með þrjár þotur og aðrar þrjár bættust við fyrir síðustu sumarvertíð.
Nú í sumar mun floti Play samanstanda af 10 nýlegum Airbus þotum og er þetta í takt við þá áætlun sem kynnt var fjárfestum í tengslum við hlutafjárútboð fyrir tveimur árum síðan. Þar söfnuðust rúmlega 10 milljarðar króna en eftirspurnin eftir hlutabréfum í félaginu var langtum meiri en framboðið.
Í fyrrnefndri fjárfestingakynningu sagði að félagið gerði ráð fyrir að vera með tólf þotur árið 2024 og fimmtán árið 2025. Spurður um þessi áform þá segir Birgir Olgeirsson, talsmaður Play, að flotaplanið sé óbreytt.
Ekki fást svör um hversu langt félagið er komið í að leigja nýjar þotur en ljóst má vera að leiguverðið í dag er mun hærra en það var árið 2021 þegar Play var að fara í loftið. Þá buðu flugvélaleigur óvenju góð kjör vegna ástandsins sem Covid-19 hafði valdið. Forsvarsfólk Play kom því líka reglulega á framfæri að félagið þyrfti aðeins að borga fyrir þoturnar þegar þær væru í notkun.
Af þessum sökum flaug Play aldrei á miðvikudögum fyrsta sumarið þar sem eftirspurn eftir flugi á þeim degi var minni en aðra daga.
Sem fyrr segir hefur tapið hjá Play verið mun meira en reiknað var með þegar flugfélagið fór í loftið. Rekstrartapið (Ebit) í fyrra nam til að mynda 44 milljónum dollara en í fjárfestakynningunni árið áður var spáð rekstrarhagnaði upp á 11 milljónir dollara. Í heildina tapaði Play 14 milljörðum króna frá ársbyrjun 2021 og fram í lok fyrsta fjórðungs 2023 en skýringin liggur meðal annars í óvenju háu olíuverði.
Stærstu hluthafar félagsins lögðu rúmlega tvo milljarða til viðbótar í reksturinn undir lok síðasta árs og nýttu sumir hluthafar þessa aukningu til að stækka hlut sinn í Play, þar á meðal lífeyrissjóðurinn Birta og sjóðir á vegum Íslandssjóða, dótturfélags Íslandsbanka.
„Að koma flugfélagi á laggirnar er kostnaðarsamt verkefni og mikil áskorun að skila góðri afkomu í upphafi rekstrar. Á sama tíma hefur félagið lent í erfiðum ytri aðstæðum og hefur einungis nýverið náð þeim skala sem þarf til að geta skilað góðri rekstrarniðurstöðu. Fjárfesting okkar í Play er hugsuð til lengri tíma. Trú okkar á viðskiptalíkani félagsins hefur vaxið frekar en hitt og horfum við mjög björtum augum til framtíðar Play,“ sagði Kjartan Smári Höskuldsson, framkvæmdastjóri Íslandssjóða, í samtali við Túrista um fjárfestinguna.
Í dag eiga sjóðir í rekstri Íslandsssjóða 9,73 prósent hlut í Play en stærsti hluthafinn, Leika fjárfestingar, fer fyrir 10,87 prósentum. Næststærsti hluthafinn er sjóðastýringafyrirtækið Stefnir með samtals 10,32 prósent sem skiptist á tvo sjóði.
