Um langt árabil var Heathrow við London sá flugvöllur í Bretlandi sem flestir nýttu til að fljúga til Íslands. Síðan tók Gatwick við keflinu en féll af stalli þegar Wow Air varð gjaldþrota í mars 2019.
Heathrow varð þá á ný helsta samgöngumiðstöðin á Bretlandi fyrir Íslandsflug. Fyrstu tvo mánuði þessa árs var traffíkin hins vegar mest á Manchester flugvelli. Samtals flugu 51 þúsund farþegar milli Keflavíkurflugvallar og Manchester í janúar og febrúar en rétt um 47 þúsund til og frá Heathrow. Farþegarnir voru aðeins færri á Gatwick flugvelli eins og sjá má hér fyrir neðan.
Í heildina flugu 231 þúsund farþegar milli Íslands og Bretlands fyrstu tvo mánuði ársins sem er tvöföldun frá sama tíma í fyrra en um 18 prósent færri en árið 2019 og í samanburði við metárið 2018 nemur samdrátturinn 23 prósent.
Þessir útreikningar byggja á tölum breskra flugmálayfirvalda en hér á landi ríkir leynd um fjölda farþega í Íslandsflugi eftir löndum. Aðeins eru birtar heildartölur og hefur Túristi árangurslaust reynt að fá því breytt.