Rekstur flugfélaga var almennt réttum megin við núllið á árunum fyrir heimsfaraldur en það átti ekki við um Icelandair, Norwegian og Wow Air. Það síðastnefnda varð gjaldþrota í ársbyrjun 2019 og hin tvo töpuðu umtalsverðum fjárhæðum bæði það ár og líka árið á undan.

Þessi þrjú norrænu flugfélög áttu það sameiginlegt að hafa aukið umsvif sín hratt í flugi milli Norður-Ameríku og Evrópu á síðasta áratug. Icelandair hafði reyndar lengi verið á þeim markaði og jafnan gert út á farþega í leit að ódýrum farmiðunum yfir Atlantshafið. Með tilkomu lágfargjaldafélaganna Wow Air og Norwegian lækkuðu fargjöldin og tekjurnar stóðu ekki lengur undir kostnaði.

Í heimsfaraldrinum var rekstur Norwegian endurskipulagður og fjárhagurinn líka. Skuldir voru afskrifaðar og kaupsamningum á þotum rift. Nýir hluthafar komu að félaginu fyirr tveimur árum síðan og þá varð Svein Harald Øygard, fyrrum seðlabankastjóri á Íslandi, stjórnarformaður.

Í dag fljúga þotur Norwegian aðeins innan Evrópu og félagið hefur líka dregið verulega úr Íslandsfluginu. Á því kann að verða breyting segir Svein Harald þegar Túristi hittir hann árla dags við morgunverðarborð í miðborg Óslóar.