Það styttist í hlutafjárútboð SAS en þar er ætlunin að fá fjárfesta til að leggja rúmlega 120 milljarða íslenskra króna í þetta stærsta flugfélag Norðurlanda. Um leið verða núverandi hlutabréf nærri verðlaus og þar með verður bundinn endi á veru sænska ríkisins í hópi stærstu hluthafa.
Ríkisstjórn Svíþjóðar ætlar nefnilega ekki að taka þátt í hlutafjárútboðinu en það ætla aftur á móti ráðmenn í Danmörku að gera. Þeir hafa lýst yfir áhuga á að eignast allt að 30 prósent hlut.
Bandaríski sjóðurinn Apollo Global Management hefur líka verið nefndur sem mögulegur fjárfestir á stórum hlut í flugfélaginu. Sjóðurinn lánaði SAS tugi milljarða króna til að koma félaginu í gegnum svokallað Chapter-11 ferli fyrir bandarískum dómstólum. Fyrir lánveitinguna fékk Apollo meðal annars forkaupsrétt á nýju hlutafé í SAS.
Danska ríkið og bandaríski sjóðurinn eru þó ekki einu áhugasömu fjárfestarnir að sögn Anko van der Werff, forstjóra SAS. Í viðtalið við Dagens Næringsliv í dag staðfestir hann að það séu fleiri en tveir fjárfestar sem hafi skrifað undir viljayfirlýsingu um þátttöku í útboðinu með myndarlegum hætti.
Það stendur nefnilega ekki til að leita til almenna fjárfesta í þessu útboði til að byrja með heldur fyrst og fremst fá að borðinu aðila sem geta sett milljarða í flugfélagið.
Hinn hollenski forstjóri SAS vill þó ekki gefa upp um hverjir þetta eru sem nú velta fyrir sér fjárfestingu í flugfélaginu en þann 26. júní næstkomandi rennur út frestur til að skila inn tilboði. Þann 14. ágúst verða tilboðin bindandi og í síðasta lagi tveimur vikum síðar liggja niðurstöður fyrir.
Þá kemur í ljós hvernig hluthafahópur SAS lítur út en fyrir liggur að ef danska ríkið verður stórtækt í útboðinu þá mun sú fjárfesting þurfa grænt ljós frá evrópskum samkeppnisyfirvöldum. Nýverið komst undirréttur Evrópudómstólsins að ríkisstyrkurinn sem SAS fékk í heimsfaraldrinum hefði verið óréttmætur.
Flugfélagið er þó í engri stöðu til að endurgreiða styrkinn enda gríðarlega illa statt jafnvel þó forstjórinn segir horfurnar góðar næstu misseri. SAS líkt og önnur flugfélög finna nefnilega fyrir mikilli eftirspurn og hátt flugmiðaverð virðist lítið draga úr neytendum. Tekjuhliðin í flugrekstri hefur nefnilega sjaldan eða aldrei litið eins vel út.
