Hótel og aðrir gististaðir skila Hagstofunni mánaðarlega upplýsingum um seldar gistinætur og þjóðerni gestanna. Þeir sem selja ferðamönnum gistingu í gegnum Airbnb og aðrar sambærilegar vefsíður þurfa aftur á móti ekki að veita sambærilegar upplýsingar né greiða af tekjunum opinber gjöld.
Til að átta sig á umsvifum þessarar óskráðu starfsemi þá gerir Hagstofan mat á fjölda gistinátta og nýtir þá meðal annars spurningakannanir sem gerðar eru meðal farþega í Leifsstöð. Matið fyrir apríl síðastliðinn sýnir að óskráðu gistinæturnar voru þá 98 þúsund talsins.
Það er ögn meira en í apríl 2017 (96 þús.) og 2018 (97 þús.) og um fjórðungi fleiri nætur en í apríl 2019 (80 þús.). Í samanburði við apríl í fyrra þá hafa umsvif heimagistingar nærri því tvöfaldast.
Hagstofan deilir þessum óskráðu gistinóttum niður á landshluta og byggir þá skiptingu á framboði gistirýmis á vefsíðum eins og Airbnb. Og samkvæmt þessu þá blómstrar heimagistingin á Suðurlandi því þar voru óskráðu gistinæturnar 23 þúsund í síðasta mánuði sem er um helmings aukning frá árunum fyrir Covid-19.
Hlutfallslega var aukningin sambærileg á Norðurlandi en þar voru gistinætur útlendinga í heimahúsum 12 þúsund. Til samanburðar voru næturnar 15 þúsund í skráðri gistingu og heimahúsin því með helming markaðarins líkt og á Vesturlandi og Vestfjörðum eins og sjá má á neðra grafinu.