„Við höfum hafist handa við stórt og metnaðarfullt verkefni en skipaútgerðir verða að bregðast við loftslagsbreytingum af alvöru. Við teljum að norska strandlengjan henti vel til að þróa nýja tækni og til siglinga á kolefnishlutlausum farkostum,“ segir Gerry Larsson-Fedde, framkvæmdastjóri hjá Hurtigruten í Noregi.
Vistvænt skip á hönnunarstigi – MYND: Hurtigruten
Hurtigruten vinnur ásamt rannsóknastofnuninni SINTEF í Þrándheimi og 12 öðrum samstarfsaðilum að því að þróa og hanna kolefnishlutlaus strandferðaskip sem henta á siglingaleiðum við Noregsstrendur. Verkefnið er kallað Sea Zero.
Nú hefur hulunni verið svipt af því hvernig þróaðasta farþegaskip sinnar tegundar mun væntanlega líta út og hvaða tæknilausnum verður beitt. Nýja skipið á hvorki að menga loft né haf og verða mun sparneytnara en hefðbundin farþegaskip.
Svona liti draumafleyið út á hægri siglingu á Hjørundfirði – MYND: Hurtigruten
„Þetta eru fyrstu drög að gerð skipa sem verða þau tæknilega háþróuðustu og sjálfbærust allra í heiminum. Lögun þeirra felur í sér minna viðnám,“ segir Gerry Larsson-Fedde, og lýsir því á síðu Hurtigruten hvaða lausnir eru notaðar í þessu skyni.
Framtíðarskipið verður með sólarrafhlöður, risastóra rafgeyma, og nútímalegan seglbúnað til að nýta vindinn. Hver hlið á þremur 750 fermetra útdraganlegum seglum verður þakin sólarrafhlöðum. Stjórnbúnaður allur verður háþróaður og m.a. stuðst við gervigreind við stýringu, skrúfur verða inndraganlegar og loftbólutækni notuð til að draga úr mótstöðu við skipsskrokkinn í sjó. Brúin verður líkust stjórnklefa nútíma farþegaþotu og á skipstjórinn að geta nýtt sér gervigreindarbúnað við að stýra skipinu.
Miklum gögnum hefur verið safnað á 130 ára starfstíma Hurtigruten, sem siglt hefur til 34 hafna við Noregsstrendur. Þessar upplýsingar verða færðar á stafrænt form og nýtast skipstjórnendum Hurtigruten og öðrum sjófarendum í framtíðinni við að gera siglingar eins öruggar og hagkvæmar og kostur er, t.d. hvenær og hvernig best er sigla til lands í vondum veðrum – og halda betur áætlun, fækka aflýsingum ferða.
Siglt undir „sólarrafhlöðuseglum“ – MYND: Hurtigruten
Nýju skipin verða svipuð að stærð og þau sem nú eru í notkun, geta flutt um 500 farþega og mikla fragt. Þau eiga að komast í þær hafnir sem fyrir eru og komast undir brýr á áætlunarleiðum.
Sem stendur eru aðeins 0,1 prósent skipa búin tækni sem tryggir kolefnishlutleysi. Þessi framtíðarskip Hurtigruten boða byltingu í farþegasiglum.