Play tók nýverið í notkun sína tíundu þotu og heldur nú úti mun tíðari ferðum en áður. Í nýliðnum maí stóð félagið til að mynda fyrir fimmtu hverri brottför frá Keflavíkurflugvelli samkvæmt talningu Túrista sem er um helmings aukning frá maí í fyrra.
Í takt við þessi auknu umsvif fjölgar farþegunum og samtals voru þeir 129 þúsund í síðasta mánuði og hafa þeir aldrei verið í fleiri. Í maí í fyrra taldi hópurinn 57 þúsund farþega en þá voru þrjú af hverjum tíu sætum óseld í ferðum félagsins. Núna var hlutfallið helmingi lægra því sætanýtingin nam 85 prósentum og hefur hún aldrei áður verið þetta há hjá Play.
Skipting farþega var líka töluvert öðruvísi í maí en mánuðina á undan því núna var hlutfall tengifarþega miklu hærra eða um helmingur. Vægi ferðamanna á leið til Íslands og Íslendinga á útleið dróst aftur á móti saman eins og sjá má á grafinu.