Fimm af þeim sex norrænu flugfélögum sem skráð eru á hlutabréfamarkað hafa nú birt flutningatölur fyrir maímánuð. Og í farþegum talið er SAS þeirra stærst því um 2,2 milljónir farþega nýttu sér ferðir félagsins í síðasta mánuði. Til samanburðar voru farþegar Icelandair um sex sinnum færri og SAS er um 17 sinnum umsvifameira en Play.
Íslenski nýliðinn er þó það norræna flugfélag sem stækkar hraðast þessa dagana. Í maí stækkaði farþegahópurinn hjá Play um 26 prósent sem er aðeins meiri vöxtur en hjá Icelandair. Umsvifin nú í sumarbyrjun jukust hægar hjá Norwegian, SAS og Finnair eins og sjá má hér fyrir neðan.
Þrátt fyrir mikinn vöxt í maí þá var sætanýtingin einnig best hjá Play eða 85 prósent en þar á eftir kom Norwegian með 84 prósent. Hjá lágfargjaldaflugfélögum er sætanýtingin vanalega mun hærri en hjá þessum hefðbundnu.
Það er ekki sjálfgefið að þéttsetnar þotur skili mestu en hvorki Icelandair né Play veita skýrar upplýsingar um fargjaldaþróunina í sínum mánaðarlegu uppgjörum. Það gera hins vegar Norwegian og SAS og milli ára nemur hækkunin um fjórðungi. Í samanburði við meðalfargjöldin í apríl þá var verðhækkunin hjá Norwegian rúmlega 1 prósent í maí en um 8 prósent hjá SAS.