Það voru 343 þúsund farþegar sem flugu til og frá Keflavíkurflugvelli með Icelandair í maí sem er viðbót 18 prósent frá sama tíma í fyrra. Óseldu sætin í þotunum voru líka mun færri núna en þá, sætanýtingin í síðasta mánuði var 80,7 prósent en aðeins 74,1 prósent í fyrra.
Samanburðurinn við maí árið 2019, fyrir heimsfaraldur, kemur hins vegar öðruvísi út.
Þá voru farþegar í alþjóðaflugi Icelandair 419 þúsund og að sætanýtingin 82,5 prósent. Hún var sem sagt hærri þó Icelandair hafi þá almennt verið að fljúga stærri flugvélum endavoru nýju Boeing Max þoturnar kyrrsettar í ársbyrjun 2019.
Hjá Icelandair er farþegahópnum í millilandafluginu skipt í þrennt; ferðamenn á leið til Íslands, þau sem hefja ferðalagið á Íslandi og svo þeir sem millilenda hér á leið milli Norður-Ameríku og Evrópu. Í maí árið 2019 og voru fyrrnefndu hóparnir tveir jafn fjölmennir og núna. Munurinn er í raun sáralítill eins og sjá má hér fyrir neðan.
Hins vegar voru tengifarþegarnir um þriðjungi færri í nýliðnum maí eða 146 þúsund samtals en 217 þúsund í maí 2019. Vægi þessa hóps var því núna aðeins 43 prósent en 52 prósent í maí 2019. Þessar breytingar eru í takt við það gerst hefur hjá Icelandair síðustu mánuði.
Hlutfall tengifarþega er nefnilega mun lægra núna en það var á árum áður en það hefur reyndar hækkað síðustu tvo mánuði.
Það sem af er yfirstandandi ársfjórðungi er vægi tengifarþega 43 prósent og nú er að sjá hvaða áhrif júní hefur á þetta hlutfall. Á sama fjórðungi á árunum fyrir heimsfaraldur var hlutfall tengifarþega mun hærra, á öðrum ársfjórðungi árið 2017 var það 54 prósent en þá var Icelandair síðast réttum megin við núllið á þessum árstíma.
Árið 2017 var olíuverðið reyndar mun lægra en nú er í dag en fargjöldin líklegast nokkru lægri enda hefur ástandinu sem núna ríkir verið líkt við draumastöðu flugrekandans. Eftirspurn eftir farmiðum er mikil þrátt fyrir óvenju hátt verðlag.
