Farþegum Play fjölgaði um 26 þúsund milli apríl og maí en öll aukningin skrifast á fleiri tengifarþega. Fjöldi Íslendinga um borð stóð í stað og sama gildir um erlent ferðafólk.
Birgir Jónsson, forstjóri Play, hefur áður gefið út að félagið ætli að fá fleiri ferðamenn um borð og að sá hópur verði meðal annars sóttur til Icelandair. Hjá því félagi fjölgaði túristunum hins vegar hlutfallslega meira milli mánaða en tengifarþegum og Íslendingum.
Spurður um þessa þróun þá bendir Birgir á að þetta séu eingöngu tölurnar fyrir maí og hinn eiginlegi ferðamannastraumur sé ekki hafinn. Birgir bætir því við að eftirspurnin hjá ferðafólki á leið til Íslands sé mikil hjá Play og ekki síst skrifist hún á ferðaskrifstofur.
Skiptingin á milli farþegahópa verður því önnur í sumar að mati Birgis en í maí var vægi tengifarþega hjá flugfélaginu 48 prósent. Forstjórinn bendir einnig á að Íslendingar ætli að fjölmenna í sólina í sumar og Play hafi náð góðri stöðu á heimamarkaðnum.
Hærri tekjur af hverjum farþega
Afkoma Play á síðustu sumarvertíð Play var verri en gert var ráð fyrir og skrifuðu stjórnendur félagsins þetta meðal annars á of marga tengifarþega. Það vantaði einfaldlega fleiri ferðamenn um borð sem gáfu meira af sér en hópurinn sem aðeins millilenti á Keflavíkurflugvelli.
En eru tengifarþegarnir verðmætari í dag en þeir voru síðasta sumar?
„Við erum að upplifa mjög mikla eftirspurn frá Bandaríkjunum og meðalverðið er mun hærra en í fyrra. Þá vorum við að setja allt bandaríska kerfið í gang og vorum alveg ný á þeim markaði. Þetta ásamt því að hliðartekjurnar okkar eru að vaxa þýðir að við erum bara mjög sátt við að ná þessum fjölda tengifarþega. Hátt meðalverð og fleiri leiðir til að afla hliðartekna eru alveg fín blanda,” svarar Birgir.
Vilja bæði gera út á túristana
Líkt og Túristi hefur áður farið yfir þá hefur hlutfall tengifarþega hjá Icelandair lækkað og er í dag töluvert frá því sem áður var. Á þeim árum sem rekstur félagsins gekk best var vægi þessa farþegahóps 53 til 58 prósent á sumrin. Núna er áherslan meiri á ferðamenn á leið til landsins hjá bæði Icelandair og Play.
Geta félögin tvö gert þetta mikið út á Ísland án þess að valda verulegum þrýstingi á ferðaþjónustuna, samfélagið og innviði?
„Við sjáum mikla og sterka stöðu hjá okkur, mun sterkari en í fyrra. Vonandi sér Icelandair það bara líka. Við viljum ferðamenn til landsins. Innviðirnir verða bara að styrkjast,” segir Birgir.
Hann bætir því við að Play hafi alltaf stefnt á að ná stórum hluta af farþegum keppinautarins og ekki bara gera út á að stækka markaðinn. Birgir segir vísbendingar um að þetta hafi tekist, til að mynda á heimamarkaðnum. Tölurnar sýni að 35 þúsund íslenskir farþegar hafi ferðast með Play í maí en 56 þúsund hjá Icelandair.
„Við ætlum augljóslega að vinna eins stóran hluta af þessum markaði og við getum og teljum okkur vera byrjuð að gera það. Það ert samt best fyrir Ísland og samfélagið hér að það séu allavega tvö sterk flugfélög í rekstri, ég hef aldrei haldið að það sé ekki pláss fyrir bæði Play og Icelandair eða að velgengni okkar snúist um að Icelandair gangi illa. Síminn gengur vel og Vodafone og Nova líka þannig að samkeppni er góð.”