Framboð á flugsætum héðan út í heim hefur aukist hratt í ár og er meira en það var 2019. Áætlunarferðir í byrjun næsta árs verða að óbreyttu fleiri en metárið 2018 samkvæmt talningu Túrista.

Forstjóri Icelandair hefur bent á að aukið framboð hér á landi sé hlutfallslega meira en í nágrannalöndum en á sama tíma sé afkoman ekki eins góð. Play er áfram rekið með tapi og stjórnendur Icelandair gera ekki ráð fyrir að ná því hagnaðarhlutfalli sem félagið hefur sett sér til lengri tíma. Forstjóri Icelandair sagði í viðtali við Túrista í gær að mikið framboð á flugi til og frá Íslandi, sérstaklega á síðasta fjórðungi ársins, hefði líklega neikvæð áhrif á afkomuna hér heima.

Play stendur undir langstærstum hluta framboðsaukningarinnar en forstjóri félagsins, Birgir Jónsson, er ekki smeykur við afleiðingar offramboðs.